童年回憶！LEGO 11374 復古太空彈珠台，真彈簧發射直衝宇宙！
LEGO 每次出親復古機，一上架就即刻被搶購一空，好似上年 Ideas 21358 咁，想買一盒都唔容易。今次 LEGO 又出大絕，發表咗呢套極具童年街機靈魂、而且真係可以郁手玩嘅 LEGO Icons 11374 Arcade Pinball Machine。呢套波子機用咗 2,274 件積木零件砌成，砌好之後高 24 公分、長 38 公分、寬 28 公分，擺喺枱面份量感極之紮實，官方開價 US$229.99 (香港預計 2026 年 7 月 1 日正式發售，折合約 HK$1800），極之吸引。今次設計師將經典嘅太空宇宙主題結合曾經風靡全球嘅波子機，設計出「拯救太空人 BB」作戰遊戲，各位鍾意懷舊電玩嘅大朋友，呢部機令小編勾起返好多童年回憶，簡直就係回憶殺！有 Feel！
純物理機械連動：雙側旋鈕控擋板，透明軌道高速彈射！
呢套波子機唔單止有個復古外殼，最正係你砌完之後真係可以玩。機身前方設有真彈簧發射器，只要你用力一拉一放，粒彈珠就會穿過透明軌道衝上宇宙！機身兩側仲特別設計咗控制旋鈕，直接連動內部嘅雙擋板。你要好似細個嗰陣打真波子機咁，用雙手控制住兩邊旋鈕，睇準時機將彈珠彈走，控制住佢穿越緩衝旋轉桿、上升坡道，去撞擊小行星，成個齒輪同彈簧嘅動態反饋做得很不錯，絕對唔係得個樣。
拯救太空人 BB 任務：面板專屬進度條，輕易重置暢玩無限次！
LEGO Icons 11374 嘅故事設定亦都非常頂癮，成個遊戲面板嘅終極目標，就係要救返飄流喺銀河裡面嘅太空人 BB。面板上特別設計咗進度條，當你成功幫太空人救返 BB 嘅時候，進度條就會話你知任務成功。玩完一次重想玩？只要手動還原，成個機制就可以重新再玩，等你可以隨時開局同朋友一齊玩。呢個純積木打造嘅街機關卡，完美體現到高階 Icons 系列喺機關設計上嘅最高誠意。
樂高太空迷大暴動：淺藍色經典太空人與超萌太空寶寶粉墨登場！
雖然部街機已經夠晒吸引，但今次盒組入面包埋嘅兩隻 LEGO 人仔，先至係令所有 LEGO 收藏家雙眼發光嘅「終極神物」。入面包含一隻首次出現嘅淺藍色經典太空人 (Light Blue Classic Astronaut)，配埋最正宗嘅太空標誌印刷，復古味濃到漏；而最破格、最萌嘅，絕對係同款配色嘅淺藍色太空人 BB (Light Blue Astronaut Baby)！就因為呢兩個人仔，小編估計呢套盒組價錢好大機會會升喇！儲開太空人嘅師兄，你又點睇呢？
【產品資訊】
- 型號：LEGO 11374 Arcade Pinball Machine
- 系列：Icons
- 適合年齡：18+
- 積木數量：2,274 件
- 發售日期：2026 年 7 月 1 日
- 預計建議售價：US$229.99
