136cm 史上最長 LEGO 星戰盒組！LEGO 75457 UCS《超級滅星者》10 月震撼開賣！

各位星戰狂熱者同埋終極收藏家，銀河帝國最強嘅壓迫感正式殺到埋身！LEGO Star Wars 終極收藏家系列，編號 75457 嘅 Executor Super Star Destroyer 即將登場！呢盒巨作由高達 6,130 片積木拼搭而成，參考售價為 US$799.99 (折合約 HK$6,280)，公開發售日期為 10 月 4 日。呢套盒組完成後長達 136cm，刷破紀錄成為 LEGO 史上最長嘅星戰積木模型，唔買都埋嚟睇下！

136cm 史上最長銀河旗艦，連帶同比例滅星者凸顯驚人尺寸落差！

喺尺寸同細節極致還原方面，呢艘 Darth Vader 嘅專屬座艦完成後高逾 20 公分、長逾 136 公分、寬逾 50 公分」，完美重現《星際大戰五部曲：帝國大反擊》裡面標誌性嘅匕首狀狹長艦身+極其複雜嘅艦體表面結構！模型直接結合咗堅固嘅展示支架，支架旁邊仲有一艘同比例 (to-scale) 嘅迷你 Star Destroyer (滅星者)，利用兩艘巨艦之間龐大嘅尺寸落差，直接展現出 Executor 喺銀河系中無可比擬嘅宏偉規模，震撼力令人忍唔住「嘩」一聲！

帝國大反擊 6 大賞金獵人首度同盒集結，艦橋小型場景經典重現！

人仔陣容更加係創下星戰商品史上嘅史詩級紀錄，一次過齊集 7 個靈魂人物，除咗 Darth Vader 之外，最令骨灰級星戰迷血脈沸騰嘅，係 LEGO 歷史上首次喺「單一盒組」裡面集齊咗《帝國大反擊》登場嘅全部 6 位賞金獵人：波巴·費特 (Boba Fett)、丹格 (Dengar)、博斯克 (Bossk)、IG-88、4-LOM 以及扎庫斯 (Zuckuss)！LEGO 更特別打造咗 Executor 艦橋 (Bridge) 嘅小型場景，等玩家可以親手重現黑武士喺艦橋發佈懸賞指令嘅傳奇經典場面！

6,130 片沉浸式拼砌體驗，打造出星戰收藏家客廳必備的鎮宅神物！

作為專為 18+ 成人高階玩家而設嘅 UCS 系列重頭戲，6,130 片零件帶嚟極高挑戰性與滿足感嘅拼砌過程，玩家仲可以配合 LEGO Builder 應用程式進行旋轉同縮放。放喺屋企展示，成艘 136cm 嘅銀河帝國旗艦橫跨眼底，就算對 LEGO 或者星戰冇咩大興趣嘅朋友睇到，都一定會俾呢盒鎮宅神物吸引住！各位星戰迷，快啲執定個吉位留俾佢，10 月 4 日準時開賣！