LEGO 21371 Ideas《超級無敵掌門狗》10 月爆開，復古邊車藏鑽石彩蛋！

各位喺 90 年代長大嘅動畫迷，以及英倫懷舊收藏家要留意喇！英國阿德曼動畫 (Aardman) 最經典嘅黏土動畫 CP 正式樂高化！喺嚟緊嘅 10 月 1 日，LEGO Ideas 21371 Wallace & Gromit，將會同各位見面，官方建議零售價為 US$99.99 (折合約 HK$785)，套裝由 1,038 片積木組裝成，係 LEGO 粉絲設計師喺「90s Throwback」比賽中奪冠嘅作品，亦係慶祝阿德曼動畫 50 週年嘅最佳紀念，小編呢啲老人家見到係感動嘅，Gen Z 們亦不妨認識一下 Wallace 同 Gromit 吖！

高逾 23cm 圓滑黏土質感，復古紅色邊車與可轉動車輪！

21371 完成後高逾 23 公分、長逾 23 公分、寬逾 18 公分，作品完美捕捉咗《超級無敵掌門狗：險過剃頭》入面嘅經典造型！設計團隊運用咗大量圓滑零件，將黏土動畫獨有嘅手作質感極致還原。Wallace 同 Gromit 騎乘嘅標誌性紅色復古電單車車連邊車 (Sidecar)，車轆仲可以實際推動旋轉，動感與美感一次過交足貨！

Gromit 護目鏡與飛揚帽帶+Wallace 靦腆笑容！

兩位主角嘅表情同動作的確係 21371 嘅精髓所在！Wallace 個嘴特別採用咗全新印刷件，重現佢最招牌嘅靦腆笑容，頭部仲可以上下左右擺動調整視線。而狗狗 Gromit 更加係 Cute 到爆 — 頭部除咗可動之外，仲可以用兩個放大鏡零件組成的護目鏡，配合手臂拉下戴上；安全帽嘅綁帶亦可以拉高，模擬喺高速行車時被風吹到喺空中飄揚效果，呢單嘢係幾搞鬼嘅！