Marvel 76347 最新昆式戰機 10 月著陸！鐳射眼+石頭人跨宇宙首度登艦！

MCU 第六階段《復仇者聯盟：末日降臨》熱血戰況繼續狂飆！LEGO Marvel 76347 Avengers：Doomsday Quinjet 亦鐵定於 2026 年 10 月 4 日正式發售，盒組共由 433 件積木拼砌而成，建議零售價 US$59.99 (折合約 HK$470)。今次套組唔單止重現咗 Marvel 最標誌性嘅王牌戰機，更加震撼嘅係人仔陣容，X-Men 同神奇 4 俠均派出代表集結。見呢期 Marvel 個勢幾強，開始多返人討論，靜咗咁多年，唔知呢次能唔能夠收復失地呢？

寬逾 34cm 霸氣空戰載具！駕駛艙與頂後雙面板全可開啓機艙！

介紹一下機體造型同結構先！呢架完成後高逾 6 公分、長逾 23 公分、寬逾 34 公分嘅昆式戰機，線條極具張力同流線感！機鼻前方特別搭載咗 2 支鉚釘射擊器，增加實體對戰嘅彈射玩味。為咗方便玩家探索機身內部，戰機前方嘅駕駛艙蓋可以輕鬆打開，正好能夠放入 1 個人仔飛行員；而戰機嘅「頂部面板」同「後部面板」更加係全數可以翻開，等你可以隨時將角色放入機艙內部組織作戰，擺放+玩味一次過交足功課！

4 大跨宇宙人仔 Dream Team：鐳射眼與石頭人強勢加盟 MCU 戰局！

人仔陣容更加係本作嘅最大爆點！全盒一次過有齊 4 個橫跨不同宇宙嘅靈魂角色：包括大反派末日博士 (Doctor Doom)、美國隊長 (Captain America)、石頭人 (Thing) 同埋鐳射眼 (Cyclops)！鐳射眼嘅現身正式確認 X-Men 加入 MCU 核心大亂鬥，而石頭人嘅登場亦預示住神奇 4 俠將會聯同復仇者聯盟並肩作戰！LEGO 好似又再一次有意無意戲透！

獨家戰鬥配件全解密！美隊折疊翅膀與石頭人雙大拳頭！

4 隻人仔喺配件細節上面亦都俾足誠意！大反派末日博士穿戴經典嘅布製披風+兜帽，並配備 2 個手部衝擊波武器；石頭人則附有專屬頭部裝飾，以及 2 個超標誌性嘅大拳頭零件；而最帥氣嘅莫過於美國隊長，除咗配有經典振金盾牌之外，背部更特別裝備咗可展開嘅折疊翅膀，擺出空中作戰姿態型到核爆！玩家仲可以配合 LEGO Builder 應用程式拼砌，10 月 4 日開賣記得第一時間入貨喇！

【產品資訊】

• 型號：LEGO 76347 Avengers：Doomsday Quinjet
• 系列：Marvel
• 適合年齡：9+
• 積木數量：433 件
• 發售日期：2026 年 10 月 4 日
• 預計建議售價：US$59.99